TULA: ‘Tatlo sa Harap ng COVID-19’ ni Rio Alma

MANILA, Philippines – Matapos ang World Poetry Day nitong Marso 21, nagsimulang mag-post sa Facebook ang Pambansang Alagad ng Sining na si Virgilio S. Almario ng mga tulang isinisulat niya sa panahon ng krisis sanhi ng pagkalat ng novel coronavirus. 

Inilalathala ng Rappler nang may pahintulot ng manunulat ang ilan sa kanyang COVID-19 poems, sa ilalim ng kanyang sagisag-panulat na “Rio Alma.”

Tatlo sa Harap ng COVID-19

1. Ala-Juanito Pelaez

Maliit ka lang, Tao,
Kulang pa ang agham mo;
Kung sana ay natuto
Sa hatol ni Pilato. 

2. Ala-Hermana Rufa 

Tao, kahit maliit
Ang agham mo’y malupit;
Magsisi na’t sumapit
Ang parusa ng Langit. 

3. Ala-Pilosopo Tasio  

Tao, maliit ka man
At kulang pa ang agham,
Walang malaking laban
Sa bayang bayanihan. 

Rio Alma
22 Marso 2020